ILOILO CITY – Gindeklarar sang Supreme Court nga unconstitutional ang layi nga naga-postpone sa pagpatigayon sang barangay kag Sangguniang Kabataan elections nagikan sa initial schedule nga December 5, 2022 sa katapusan nga Lunes sang Oktubre subong nga tuig.
Sa pihak sini, ginkilala sang High Tribunal ang legal practicality kag ang kinahanglanon nga pagpadayon sang eleksyon sa Oktubre 30 bilang pagsunod sa operative fact doctrine.
Sa desisyon nga pirmado ni Associate Justice Antonio T. Kho, Jr., gin-grant sang Korte Suprema ang consolidated petitions sang pila ka mga abogado nga nagakwestiyon sang constitutionality sang Republic Act No. 11935 nga nagpa-iway sa December 2022 barangay and Sangguniang Kabataan elections.
Suno sa Supreme Court Public Information Office, ginlapas sang RA 11935 ang kinamatarong sa pagboto bangud nga napaslawan sini nga masabat ang mga requisites sang substantive aspect sang due process clause sang Constitution.
Nakita man sang highest court nga wala sang legitimate government interest ukon objective agud nga suportahan ang amo nga layi kag ini ang nagalapaw na sa gahum sang Congress nga maghimo sang layi.
Ang pamaagi nga gingamit sang Kongreso ang ginkabig nga “unreasonably unnecessary” sang High Tribunal agud nga malab-ot ang interes sang gobyerno.
Ini ang ginlaragway nga “unduly arbitrary or oppressive of the electorates’ right of suffrage.”
