Nakaangkon sang ‘promising results’ ang clinical trial nga ginapatigayon sang Department of Science and Technology-Food and Nutrition Research Institute (DOST-FNRI) sa virgin coconut oil ukon VCO bilang food supplement nga makabulig sa pagbulong sang coronavirus disease 2019 (COVID-19).
Suno kay Science Secretary Fortunato dela Peña, sa 40 ka volunteer-patients nga nagakigbahin sa trial sa Santa Rosa, Laguna, 10 na lang ang nabilin sa Santa Rosa Community Hospital para sa treatment kag medical care.
Suno kay Dela Peña, nagatinguha pa ang DOST-FNRI agud madamo nga volunteers ang maka-enrol sa trials.
“We can stop with 56 volunteers,” pahayag sang tiglikom.
Una na nga naghatag sang P5 million nga pondo ang DOST para sa clinical trials.
Ang clinical trials para sa VCO bilang food supplement ang ginabululigan sang DOST-Calabarzon, Philippine Coconut Authority (PCA), kag local government unit (LGU) sang Santa Rosa, Laguna sa pagpamuno ni Mayor Arlene Arcillas-Nazareno.
Suno pa sa DOST chief, magadugang pa sang hospital site para sa clinical trials sa VCO agud mapadasig ang research kag development kag mapamatud-an ang therapeutic claims sang VCO bilang bulong sa COVID-19.
Magluwas sa Santa Rosa Community Hospital sa Laguna, naghatag man sang pondo ang DOST sa clinical trials sa VCO nga iga-conduct sang University of the Philippines-Philippine General Hospital.
Idugang man suno sa DOST ang Valenzuela Emergency Hospital sa Valenzuela City sa duha ka existing sites.
