Nagpanawagan ang Movie and Television Review and Classification Board (MTRCB) sa publiko nga mangin responsable man sa ila nga komento sa chairperson sang talatapan nga si Lala Sotto.
Ginpaguwa ang statement isa ka semana matapos gin-anunsyo ang suspensyon sa isa ka noontime show bangud sa ginpahayag indi disente nga akto sang host nga si Vice Ganda kag sang iya real-life partner nga si Ion Perez.
Suno kay MTRCB Vice Chairman Njel de Mesa, sang nagliligad nga semana, indi na basta-basta nga mensahe kag rape kag death threats ang nabaton sang opisina nga gina-address kay Sotto.
May mga nagapanawagan man nga mag-resign na ini kag may yara pa sang nagapangabay nga kuntani mapatay na lang ang opisyal.
“Chairperson Lala Sotto is a dedicated public servant who has spent her career advocating for responsible and inclusive media content. She has consistently championed the importance of media content that respects cultural sensitivities while contributing positively to the Philippine entertainment industry,” depensa ni De Mesa sa amo nga statement.
Dugang pa sang ahensya, indi lamang iligal ang harassment kag violence kundi wala pa nagasanto sa dapat prinsipyo sang Filipino value-based media kag entertainment culture.
“No Filipino deserves such kind of unfounded personal attack. We must not resort to personal attacks because our agency is just doing its mandate,” suno naman kay MTRCB Executive Director II Atty. Mamarico Sansarona Jr.
Nagakahangawa man ang board sa safety ni Sotto kasunod sang amo nga death threats.
Si Lala amo ang anak ni former Senate president Vicente “Tito” Sotto III nga isa man ka host sang isa ka noontime show nga competitor sang show nanday Vice Ganda.
Si Lala man ang ginbasol sang nag-guluwa ang mga laragway nga nag-courtesy call sa iya ang Kapisanan ng Social Media Broadcasters ng Pilipinas, Incorporated sang Agusto 24.
Ang amo nga grupo ang nagpasaka sang kaso kanday Vice Ganda kag Perez bangud sa gin-alegar nga paglapas sa Republic Act No. 10175 ukon ang Cybercrime Prevention Act.
Una na nga gin-athag ni Sotto nga wala siya sang nangin kaangtanan sa amo nga grupo kag wala siya sang kaangtanan sa ila desisyon nga magpasaka sang kaso batok sa amo nga hosts. #
