JARO– Natuhog sang manibela sang iya man lang motorsiklo ang isa ka lalaki matapos ini ang makabunggo sa depampasahero nga jeep sa Cuartero highway sa distrito sang Jaro, Iloilo City.
Ang lalaki ginkilala si Richard Camonias 26-anyos sang Bgry. Mali-ao, Pavia Iloilo.
Ang driver naman sang jeep ginkilala nga si Joven Lapizar sang Brgy. Dungon C, Mandurriao Iloilo City.
Sa interview sang Bombo Radyo kay Joven Lapizar, iya ginpahayag nga nakibot lang sya sang gulpi lang nga nagbunggo ang motorsiklo sa likod nga bahin sang iya jeep.
Samtang suno naman kay Police Staff Sergeant Jorie Junio traffic investigator sang Jaro Police Station, nagkinahanglan pa nga gamitan sang hydraulic cutter agud makuha ang naga angot nga manibela sa pa-a sang driver.
Dugang ni Junio, posible nga rason sang pagkabunggo sang motorsiklo bangud madulom ang dalan kag madasig ang pagpadalagan sini.
Suno naman sa driver sang motorsiklo, makadto lang kun tani sya sa iya nga asawa sang natabo ang insidente kag ginpanginwala niya nga naka inom sya.
