ILOILO CITY- Ginkumpirma ni Punong Barangay Alan Macazar sang Barangay Bonifacio, Arevalo, Iloilo nga isa gid man ka drug surrenderer sa ila barangay ang tricycle driver nga ginluthang- patay sang riding in tandem.
Ang biktima amo si Arnold Alipio samtang nadalahig man kag nasamaran ang barangay secretary nga si Geraldine Jocson nga nagasakay sa tricycle nga ginamaneho ni Alipio sang natabo ang pagpangluthang.
Sa interview sang Bombo Radyo kay Punong Barangay Macazar, iya ginpahayag nga wala naman nagbalik sa bisyo si Alipio kag sa pagkamatuod, naganegosyo ini sang batchoyan magluwas sa pagbyahe sang tricycle.
Suno kay Macazar, sa subong, indi pa maathag kun ano ang motibo sa natabo nga krimen.
Padayon man ang pagpangita sang mga footages sa closed circuit television camera nga posible makabulig agud madasig matumod ang mga suspek.
