Ginbawian gid sang kabuhi ang isa lalaki matapos ini nabun-an sa Barangay Caboloan Sur, Oton, Iloilo, kahapon.
Ang biktima amo si Jerry Nequing, 40-anyos, kag residente sang nasambit nga lugar.
Duha naman ang napilasan sa insidente nga amo sanday alyas Art, 38-anyos kag alyas Jo, 57-anyos nga lunsay residente sang amo man nga barangay.
Ang suspek amo si alyas Jonel, 38-anyos kag residente sang Barangay Tuburan, Oton.
Sa interview sang Bombo Radyo kay PLtCol. Arnel Solis, hepe sang Oton Municipal Police Station, iya ginpahayag nga natabo ang insidente kadungan sang fiesta sa barangay.
Suno kay Solis, base sa imbestigasyon, nagluntad ang komosyon sa gwa sang gym.
Pahayag niya, antes ang hitabo, may yara man sang pagbaisay sa tunga sang mga involved nga indibidwal.
Madasig man nga ginpangdala ang mga biktima sa ospital apang wala na natabangan si Nequing.
Arestado naman ang suspek.
Gin-alegar naman sang utod ni Nequing nga nagtambag lang ini matapos makit-an ang iya hinablos nga gintapungol sang grupo sang suspek apang siya ang ginbuno man.
Sa interview sang Bombo Radyo kay alyas “Fourth”, wala man sila makahibalo kun ano gid ang ginhalinan apang sa panaysayon sang hinablos, masakit ang tulok sang isa sa grupo sang suspek kag sang naglabay ini kag ginsita.
Desidido ang pamilya sang napatay nga magpasaka sang kaso batok sa suspek.
