Patay ang isa ka bag-ong bun-ag nga lapsag matapos ini ginhaboy sang iya iloy halin sa bintana sang hotel sa France.
Suno sa French prosecutors, nagaangot pa ang umbilical cord sang ginpahurabog ang lapsag halin sa ikaduha nga panalgan sang hotel sa eastern Paris.
Ginhatagan sang emergency care kag gindala sa ospital ang bata apang wala gid nakaluwas. Suno sa pulis, ginpahibalo lamang sila nga nasapwan na ang bata nga naputos sa tela kag yara na sa atubang sang hotel.
Nadiskubrehan man nga ang iloy sini amo ang 18-anyos nga American nga nagbata sa amo man nga hotel.
Gindala man ang iloy sa ospital, ginpaidalom sa treatment kasunod sang iya pagbun-ag, apang ginabantayan ini sang mga pulis.
Base sa French officials, estudyante ang iloy kag kabahin sang grupo nga nagkadto sa Paris para sa study trip kaupod ang iban pa nga mga estudyante halin sa United States.
May ginlunsar naman ang awtoridad partikular ang police juvenile protection unit nga murder investigation kasunod sang amo nga insidente.
