Ilubong na subong nga adlaw, Hulyo 19, si late Jaro Arbishop-Emeritus Most Reverend Angel Lagdameo, DD.
Napatay ang 81-anyos nga ‘people’s bishop’ sang Hulyo 8 sa St. Paul’s Hospital – Iloilo.
Sa interview sang Bombo Radyo kay Rev. Father Angelo Colada, director sang Social Communications sang Archdiocese of Jaro, iya ginpahayag nga alas-nueve sa aga, may yara sang patigayunon nga misa kag ilubong ang remains sa columbarium nga nahamtang sa right portion sang Jaro Metropolitan Cathedral.
Bukas sa publiko ang lubong sang anay arsobispo. Ang mga magatambong sa lubong amo ang mga obispo sa nagkalain-lain nga mga archdiocese kag amo man si Apostolic Nuncio to the Philippines Archbishop Charles John Brown.
Subong nga adlaw, indi man pagpahanugutan ang pagsulod sang salakyan sa Jaro Metropolitan Cathedral magluwas lamang sa salakyan sang apostolic nuncio.
Matandaan nga nagserbe si Lagdameo bilang arsobispo sang Archdiocese of Jaro sa sulod sang 18 ka tuig — halin sang Marso 11, 2000 tubtub nga nag-retiro siya sang 2018.
Nangin presidente man siya sang Catholic Bishops’ Conference of the Philippines (CBCP) halin sang Disyembre 2005 tubtub sang Disyembre 2009.
