Maga-apelar ang legal team ni anay Presidente Rodrigo Duterte kasunod sa desisyon sang International Criminal Court Pre-Trial Chamber 1 nga ipasaka sa full-blown trial ang kaso.
Suno kay Atty. Nicholas Kaufman, magahingyo sila agud maka-file sang apelar sa desisyon nga gintawag sini nga “most bizarre” ukon mabudlay hangpon.
Ginpahayag man sini nga kaangay nga nagapabor ang pre-trial chamber sa prosecution kag wala ginakonsiderar ang kinamatarong ni Duterte sa isa ka patas nga hearing.
Ginkuwestyon man sang defense team ang ila ginpahayag nga kakulangan sang detalye sa mga akusasyon.
Sa pihak nga bahin, nagpahayag ang anay Chief Presidential Legal Counsel Atty. Salvador Panelo nga sa iya panan-awan, kaangay nga daw “pre-judged” na ang kaso kag ginpahayag sini ang alegasyon nga may ara sang pagbinuligay sa tunga sang ICC kag sang subong nga administrasyon.
Ginpanginwala naman sang Malacañang ang amo nga mga alegasyon.
Gilayon nga nagsabat si Palace Press Officer Undersecretary Atty. Claire Castro nga 2017 pa sang ginpasaka ang mga kaso ukon antes pa nakapungko sa pwesto si President Ferdinand Marcos Jr., kag wala ini sang labot sa subong nga administrasyon.
Dugang pa sang Malacañang, kun wala sang natabo nga mga pagpatay, indi tani ini makaabot sa ICC.
Suno sa ila, ang mga insidente natabo sa idalom sang implementasyon sang “war on drugs” kag wala labot ang sa subong nga Presidente diri.
