Ginpaathag ni Department of Justice (DOJ) Secretary Menardo Guevarra nga mangibabaw sa gihapon ang resolution sang pandemic task force sang gobyerno batok sa executive orders nga gina-isyu sang local government units (LGUs).
Kasunod ini sang isyu sa Cebu matapos nga nag-mandu si Cebu Governor Gwendolyn Garcia nga optional na lang ang pagsuksok sang face masks kun yara sa guwa. Sa executive order ni Garcia, nakasaad nga required lang ang face mask sa closed ukon air-conditioned spaces.
May natabo nga pagsalangisag bangud may yara sang resolution ang Inter-Agency Task Force for the Management of Emerging Infectious Diseases (IATF) nga naga-require sang mandatory nga pagsuksok sang face masks bisan sa indoor ukon sa outdoor settings sa bug-os nga Pilipinas.
Apang suno naman kay Guevarra, ang resolutions sang IATF ang gina-incorporate ukon ginapahanugutan paagi sa executive orders nga gina-isyu mismo sang Presidente.
Bangud nga gin-isyu ini sang IATF nga ginabug-usan sang cabinet secretaries nga amo ang alter egos sang presidente, amo ini dapat ang magalabaw suno sa tiglikom bangud ang Presidente amo ang may ginakilala nga general supervision sa local governments pursuant sa Section 4, Article X, sang Philippine Constitution.
