ILOILO CITY – Pirmado na ni Iloilo Governor Arthur Defensor Jr. ang lima ka ordinansa may kaangtanan sa Coronavirus Disease 2019.
Sa interview sang Bombo Radyo kay Iloilo Vice Governor Christine Garin, iya ginpahayag nga ang ila ka ordinansa nga ginpasar sang Sanguniang Panlalawigan amo ang masunod;
Una na diri amo ang istrikto nga pagpatuman sang pagsuksok sang face mask sa mga pampubliko nga lugar kadungan sang ginapatuman nga Enhanced Community Quarantine nga magasugod na bwas sa diin may yara sang nagakaigo nga silot ang madakpan nga wala nagasunod sa nasambit nga mandu nga amo ang first offense; warning, second offense; penalidad nga P1,000 kag third offense; P2,000 kag pulo ka adlaw nga pagkapreso.
Ika duha nga ordinansa amo ang pagpatuman sang physical distancing sa mga pribado kag iban pa nga establisyemento agud malikawan ang paglapta sang virus.
Ikatatlo, ang paghatag sang silot sa mga pasyente nga apektado na sang COVID-19 nga madakpan nga nagabutig kag wala nagasugid sang matuod may kaangtanan sa ila nga kondisyon.
Ikaapat amo ang hugot nga pagdumili sa pagpalapta sang sala nga impormasyon may kaangtanan sa COVID-19.
Kag ika-lima amo ang anti-hoarding ukon ang pagadumili sa pagbakal sang masobra sa kinahanglanon.
