Lima na ang patay kag 64 ang injured bangud sa magnitude 7 nga linog nga nagtay-og sa Abra suno sa rekord sang Office of the Civil Defense (OCD).
Sa latest report ni OCD Assistant Secretary Bernardo Alejandro IV, ginpahayag nga may duha ka patay halin sa La Trinidad kag Tuba, Benguet kag may tag-isa naman sa Balbalan, Kalinga; Bangued, Abra; kag Gattaran, Cagayan.
Sa 64 nga nagkalapilasan, 57 ang yara sa Cordillera Administrative Region (CAR) kag pito ang yara sa Region 1.
Kun basehan naman ang report ni Interior Secretary Benjamin Abalos Jr., 218 ka mga banwa sa 15 ka mga probinsya ang apektado sang mabaskog nga linog.
Sandig naman sa report sang Department of Education (DepEd), 61 ka mga eskwelahan ang na-damage sa Regions 1, 2, 3, kag CAR.
428 houses ka balay ang nahalitan kun sa diin 423 gid ang yara sa CAR kag lima sa Region 1.
Ginahulat pa subong ang reports may kaangtanan naman sa halit sa iban pa nga assets kag sa agrikultura.
Sa bahin sang National Disaster Risk Reduction and Management Council (NDRRMC), ginpahayag sang spokesperson nga si Mark Timbal nga may nagkalahalitan man nga heritage structures sa Cordillera kag Region 1.
Ginsaad naman sang Department of Social Welfare and Development (DSWD) nga may P328 million sang pondo nga standby agud ibulig sa mga biktima.
Una na nga nagpahayag si President Ferdinand ‘Bongbong’ Marcos, Jr. nga indi pa kinahanglan ang pag-deklarar sang state of calamity, apang gin-athag sini nga posible pa ini nga magbag-o depende sa report nga iya nga mabaton halin sa field. ##
