ILOILO CITY- Patay ang isa ka llamador matapos ginluthang sa gwa sang bulangan sa Barangay Pagdugue, Dumangas, Iloilo.
Ang biktima amo si Melvin Panes, pumuluyo sang Passi City apang nagaistar sa Sambag, Jaro, Iloilo City.
Sa interview sang Bombo Radyo kay Generoso Tacluyan, pumuluyo sang San Isidro, Jaro, Iloilo City kag isa man ka llamador sa bulangan, iya ginpahayag nga bag-o lang sila naghalin sa bulangan sakay sa motorsiklo sang hinali lang nga may nag-overtake nga duha ka lalaki nga sakay man sa motorsiklo.
Suno kay Tacluyan, hinali lang nga nagpalupok sang pusil ang angkas sang amo nga motorsiklo kag naigo si Panes nga amo ang naga-drive sang motorsiklo gani natumba kag nagtumpilak sa kanal ang mga ini.
Pahayag ni Tacluyan, tatlo ka lupok ang iya nabatian.
Matapos ang pagpangluthang, nagpalagyo man ang mga suspek nga lunsay nakasuksok sang helmet.
Nangayo pa sang bulig si Tacluyan sa mga tawo sa lugar agud madala sa ospital ang biktima nga ginapahayag nga may igo sang bala sa ulo kag lawas apang sang ulihi ginbawian gid ini sang kabuhi.
