ILOILO CITY- Wala sa gihapon makabaton sang guidelines ang Land Transportation Franchising and Regulatory Board-Region VI may kaangtanan sa 6,000 pesos nga fuel subsidy sa mga operators sang jeep kag tricycle nga pagasugudan na kuntani subong nga bulan.
Sa interview sang Bombo Radyo kay Atty. Salvador Altura, Legal Officer sang Land Transportation Franchising and Regulatory Board-Region VI, iya ginpahayag nga siya mismo ang indi makahambal kun san-o gid magatupa ang fuel subsidy.
Suno kay Altura, indi magahalin sa Land Transportation Franchising and Regulatory Board Region 6, ang budget sang fuel subsidy kundi sa Department of Transportation apang bangud naga- involve ini sang Public Utility Vehicles, sila gid ang magaserbe nga frontliner.
Ginpaathag man niya nga ang mga terms and conditions kun madayon gid man ang fuel subsidy ang base man sa mga nauna nga napatigayon na nga subsidies.
Nahibaluan nga ginpahayag ni Teofilo Guadiz, Chairman sang Land Transportation Franchising and Regulatory Board nga ang one-time fuel assistance ang ihatag sa mga operators nationwide apang unahon ang mga modernized jeepneys kag ihatag sa ulihi nga semana sang Agosto.
