Matigdas nga nagpanginwala si Senator Christopher “Bong” Go nga may kahilabtanan man siya sa operasyon sang Davao Death Squad (DDS).
Ini ang kasunod sang ginpangbuyagyag sang self-confessed DDS hitman kag retirado nga police officer nga si Arturo Lascañas nga si Go ang ginasugo nga magkuha sang lista sang mangin target sang grupo.
Pahayag naman ni Go, wala sang amo sini nga mandu si anay Presidente Rodrigo Duterte kag halin sang una, wala gid ini sang ginasugo sa iya nga iligal. Lunsay kabutigan kag himu-himo lamang ini nga istorya suno pa sa iya.
“Pure lies and fabrications — plain and simple. Walang ganyang order na ibinigay si dating Pangulong Duterte. Even since when he was still the mayor of Davao City, never nagbigay ng ganyang klaseng order si PRRD. Kailanman ay wala siyang inutos sakin na iligal,” pahayag sang senador.
Dugang pa sini, naga-tutok siya sa iya trabaho bilang senador kag wala sang iban nga tuyo kundi buligan ang mga Pilipino.
“Kung may katotohanan sa sinabi niya at may tunay na pagkakasala kami, dapat noon may nakasuhan na. Lumang tugtugin na yan, estilo nilang bulok para tapunan ng putik ang iba upang magmukhang malinis sila,” dugang sini nga pahayag.
Una na nga ginsiling ni Lascañas nga ang iya mga nahibaluan sa Oplan Tokhang kag DDS ang nalakip na sa iya ginpasa sa International Criminal Court (ICC).
Una man sini nga gin-tag sanday Vice President Sara Duterte kag Senator Ronald “Bato” Dela Rosa nga may kaangtanan man sa amo nga vigilante group.
Ginsiling naman sang bise-presidente nga bag-o ang script nga ini kag ginadalahig lamang ang iya pangalan agud nga madala man siya sa akusado kag imbestigaran sang ICC.
“Bago ang script na ito. Sa mga taon na nagsilbi ako bilang Vice Mayor at Mayor ng Davao city, ni minsan ay hindi naugnay ang aking pangalan sa isyung ito,” kabahin sang pahayag sini sa isa ka video statement.
Ginhangkat man sini ang mga indibidwal nga naga-tag sa iya nga suspek nga magpasaka sang kaso sa iya sa korte diri sa Pilipinas. #
