MALACAÑANG – Liwat nga ginklaro sang Malacañang nga wala sang problema si Presidente Rodrigo Duterte sa iya ikaayong lawas.
Ini matapos nga namutikan sang mga netizens ang wristband nga suksok ni Presidente Duterte nga ginapahayag medical plaster.
Suno kay Presidential Spokesperson Salvador Panelo, indi medical plaster ang suksok sang Presidente kundi isa ka wristband nga naga simbolo sang iya kampanya para sa pagpalapta sang paghidait sa bilog nga pungsod kag normal lang nga magsuksok sang wristband.
Dugang sang natungdan, wala sang nagakadapat nga ikabalaka ang publiko kun ikaayong lawas sang presidente ang paga istoryahan bangud si Presidente Duterte mismo ang mahambal kun indi maayo ang iya pamatyag.
Nagpasalig ang natungdan nga wala sang ginatago ang Malacañang sa publiko ilabi na ang may kaangtanan sa isyu sang ikaayong lawas sang Presidente.
