Patay ang isa ka tigulang matapos gintiro sang iya mismo kaugalingon nga utod sa Brgy. Talongonan, Passi City.
Ang biktima amo si Alyas El, 60-anyos kag pamilyado.
Ang suspek naman amo si alyas Fed, 65-anyos, kag isa ka laon.
Sa interview sang Bombo Radyo kay PLt. Charina Pagmanoja, Deputy Chief of Police sang Passi City Police Station, iya ginpahayag nga hubog ang biktima sang natabo ang insidente.
Suno sa iya, nagasinggitan ang biktima rason nga naggwa ang suspek kag ginhaboy ang balay sang iya utod.
Pagkatapos sini, wala sang pagduha-duha nga ginluthang sang suspek ang biktima gamit ang isa ka homemade 12-gauge shotgun.
Gindala pa sa ospital ang biktima apang gindeklarar nga dead on arrival.
Samtang, nakuha sang mga kapulisan sa lugar sang krimen ang isa ka homemade 12-gauge shotgun, isa ka empty shell, kag isa ka live ammunition.
Samtang, gin-ako naman sang magulang nga naimpito ini gani gintiro niya ang manghod.
Suno sa suspek, naubos gid ang iya nga pasensiya kag pagpaumod sa iya manghod sang amo nga tion.
Dugang pa sini, wala man sila sang daan nga hiligut-anon sang iya manghod antes ang insidente.
Sa subong, yara na sa kustodiya sang Passi City PNP ang suspek kag ginahanda na ang kaso nga ipasaka batok sa iya.
