Gin-athag ni President Ferdinand Marcos Jr. nga wala nagapangita sang away ang Pilipinas apang magapanindugan ini agud depensahan ang teritoryo sang pungsod.
Ini ang labing-una nga pahayag sang presidente halin sang ginmandu sini sa Philippine Coast Guard (PCG) nga kuhaon ukon utdon ang 300-metros nga floating barrier nga ginbutang sang China sa Scarborough Shoal nga kabahin sang exclusive economic zone sang Pilipinas kag ginakabig nga isa ka traditional fishing ground.
Kasunod sang amo nga hitabo, nagpaandam si Chinese Foreign Ministry Spokesperson Wang Wenbin nga indi mang-garit-garit ang Pilipinas ukon magtilaw nga magpasaka sang tensyon.
Apang suno kay Marcos, wala man siya nagapangita sang away kundi ginadampigan lamang ang ang kinamatarong sang mga manugpangisda nga Pinoy nga nagapangita sang palangabuhian sa amo nga area sa sulod na sang ginatos ka tuig.
Pahayag ni Marcos, sang ginkuha sang PCG ang floating barrier nga ginbutang sang China, nakahulik pa ang mga manugpangisda sang masobra 160 tonelada nga isda sa sulod lamang sang isa ka adlaw.
Sang amo man nga adlaw, may nakuha ang PCG nga anchor sang barrier nga ginbutang sang Beijing nga subong ginakabig pamatuod nga indi himo-himo ang pahayag sang Pilipinas. #
