Ginbuyagyag naman ni Senate President Juan Miguel Zubiri nga maga-apelar si President Ferdinand Marcos Jr. sa Kamara nga untaton na ang lihok sa people’s initiative sa pagduso sang charter change ukon pag-amyendar sa 1987 Philippine Constitution.
Suno kay Zubiri, nakabaton siya sang text message halin sa President’s office nga naga-imbitar sa iya sa lunch meeting kahapon sa Malacañang antes ang paglupad ni Marcos sa Vietnam para sa duha ka adlaw nga state visit. Sa amo nga meeting, nakaupod man nila sanday former senator Juan Ponce Enrile kag Executive Secretary Lucas Bersamin.
Suno pa kay Zubiri, gintugutan siya sang presidente nga isapubliko ang tikang sini nga ipauntat sa Kamara ang kontrobersyal nga people’s initiative.
“I have his permission to disclose what we had discussed this morning. President Marcos is set to appeal to the House of Representatives to stop the dreaded PI or their version of the people’s initiative and the other people’s initiatives initiators,” lakip sa ginpahayag sini. “In his words, my dear colleagues, ‘It is getting out of hand.'”
Ginsiling pa ni Zubiri nga halin pa lamang sang una, nagapanindugan na ang senado nga ang people’s initiative nga ginaduso sang Kamara ang magatunga gid sa nasyon.
“We in the Senate thank the President for his commitment, and we remain firm in our vigilance against any attempts to destabilize our democracy. We maintain that the ongoing people’s initiative is flawed and unconstitutional, and offers no solution to the problems most urgently affecting our people,” pahayag pa sang senador.
Antes sini nga lihok sang presidente, nauna na ang Commision on Elections sa pagpaguwa sang en banc decision nga isuspinde ang tanan nga proceedings sa people’s initiative — tikang nga gin-abi-abi kag ginkalipay sang mga senador.
