ILOILO – Hingyuon sang Iloilo Provincial Government ang bulig sang mga medical organizations, academic institutions, kag iban pa nga grupo para sa mas masangkad nga education drive sa mga barangay sa probinsya sang Iloilo may kaangtanan sa COVID-19 vaccination.
Sa interview sang Bombo Radyo kay Iloilo Governor Arthur Defensor Jr., iya ginpahayag nga natapos na ang education campaign ukon sa mga session sa mga opisyal sang barangay kag frontline workers nga nagatrabaho sa rural health units gani tion naman agud nga lab-uton ang mga pumuluyo.
Base ini sa nakabutang sa COVAC plan sang probinsya nga ‘institutional linkages with organization for vaccine information’.
Liwat man nga ginpahanumdom ni Defensor sa publiko ang iya memorandum order nga ginpagwa sang Marso 16 para sa mas istrikto nga pagpatuman sang health protocols.
Dapat likawan suno sa iya ang pag-home quarantine sa mga COVID-19 positive nga mga pasyente nga nagabatyag sang sintomas.
Gina-abisuhan ang mga Local Government Unit (LGU) nga magbutang gid sang isolation facility sa kada barangay para sa mga symptomatic nga mga pasyente.
Dala man diri ang mas agresibo nga contact tracing kun sa diin sa sulod sang 24 ka oras matapos ma-detect ang COVID-19 case, dapat nga ma-trace na, ma-identify, kag ma-subject sa quarantine measures ang tanan nga close contacts sang infected nga pasyente.
Ginaabisuhan man ang otoridad nga istrikto nga i-monitor ang clustering sang COVID-19 cases kag kun ipatuman ang containment measures kaangay sang lockdowns, dapat nga nagasunod ini sa National Task Force COVID-19 Zoning Containment Strategy.
