Nakapauli na diri sa Pilipinas ang una nga batch sang mga Pinoy nga nakaguwa halin sa Gaza Strip, ang teritoryo sa Palestine nga gina-gyera sang Israel sa tuyo nga mapudpod ang Hamas militants.
Sa sini nga batch, 34 ang mga Filipinos kag may isa ka Palestinian National.
Suno kay Department of Foreign Affairs (DFA) Undersecretary Eduardo de Vega, kabahin sila sang 40 ka Filipinos nga ginpahanugutan nga makatabok sa Rafah ukon sa Gaza-Egypt border sa temprano nga bahin subong nga semana.
Anum sa ila ang nagpabilin sa Cairo, Egypt bangud may isa nga kasado sa Egyptian citizen samtang nagabusong naman ang tatlo sa ila.
Kaangay sa iban nga Filipinos nga nagpauli halin sa Israel, may ihatag man nga assistance sa repatriates nga magahalin sa DFA, Overseas Workers Welfare Administration, kag Department of Social Welfare and Development.
Una na nga gin-anunsyo ni President Ferdinand Marcos Jr. nga magluwas sa sini nga batch, may 56 pa ka mga Pinoy nga nakaguwa naman sa Gaza kag iga-proseso man nga makapauli diri sa Pilipinas. #
