Nagapangayo na sang dugang nga assistance sa national government kag mangin sa international organizations ang municipal government sang Socorro, Surigao del Norte agud nga mabuligan ang 3,000 ka mga residente nga nagpa-myembro sa ginpahayag kulto nga Socorro Bayanihan Services Inc.
Suno sa Task Force Kapihan, matapos nga ginpangbaligya ang ila balay kag nagsulod sa kulto sang 2019, yara na sa 1,000 ka mga pamilya ang nagatinir sa Sitio Kapihan kag wala sang kaugalingon nga mga propiedad.
Photo Courtesy: Senator. Risa Hontiveros
Sang sini lang, ginsuspinder sang Department of Environment and Natural Resources (DENR) ang Protected Area Community-Based Resource Management Agreement sa Socorro kag nagsiling nga ang duta ang pwede lamang magamit sa pang-agrikultura kag indi pwede istaran.
Samtang, nagapabilin naman nga naka-detain sa Senado ang lider sang kulto nga si Jey Rence Quilario alias Senior Agila kag ang tatlo ka iban pa nga ranking officials.
Nagapakig-angot naman ang Senado sa law enforcers para sa safe nga pagpatigayon sang masunod nga hearing nga himuon mismo sa Socorro.
May dugang pa nga mga testimoniya batok kay Senior Agila kaangay sang “supernatural powers” sini nga ginpatihan gid sang mga myembro.
Suno kay alias Lovely nga anay myembro sang grupo, halin pagkabata niya, yara na sa kulto ang iya mga ginikanan kag kauturan. Suno sa iya, kalabanan sa ila ang nagapati nga si Senior Agila ang “reincarnated Sto. Niño” ukon Child Jesus kag amo man ang bag-o nga Messiah nga makahimo sang mga milagro.
Pahayag ni Alias Lovely, mapauntat ni Senior Agila ang ulan, kag mapakanta sini ang subay kun sa diin tingog sang pispis ang mabatian.
‘las tres sa kaagahon, may yara man sang worship services kun sa gina-recite nila ang mga pagsulundan sang grupo kag ang pila ka dinalan halin sa book of legends nga ginsulat mismo ni Senior Agila.
Sa amo man nga libro nakasulat nga indi makasulod sa langit kag makapadulong sa impyerno ang sin-o man nga maglapas sa pagsulundan ni Quilario.
Huwebes sang nagligad nga semana sang nagpatigayon ang Senado sang joint committee inquiry nga nagtutok sa diskusyon sa gina-alegar pagpanghimulos, sekswal nga pagpang-abuso, pagpang-abuso sa mga kabataan, kag pagpamilit sa pagpakasal nga pila lamang sa iligal nga mga aktibidad sa amo nga sitio.#
