ILOILO CITY- Ginhingadlan ni Iloilo City Mayor Jerry Treñas si Senator Francis Escudero nga amo ang iya ginatumod nga senador nga kaangay nga nagserbe nga legal counsel sang National Grid Corporation of the Philippines.
Ini may kaangtanan sa pahayag ni Mayor Treñas nga may mga senador nga daw nagaapin pa sa amo nga korporasyon sa ginpatigayon nga hearing sa senado kahapon kaangot sa natabo nga power blackout sa Region 6 sang Enero 2 tubtob 5.
Sa interview sang Bombo Radyo kay Iloilo City Mayor Jerry Treñas, ginpahayag sang alkalde nga naobserbahan niya nga sang nagahatag pa lang sang statement si Robinson Descanzo, ang chief operating officer sang Independent Electricity Market Operator of the Philippines (IEMOP) kaangot sa notice nga dapat kuntani ginpagwa sang National Grid Corporation of the Philippines agud i-alerto ang utility companies agud malikawan ang system collapse, kaangay nga gusto na ni Escudero nga mag-cross examine Sa IEMOP.
Suno kay Treñas, wala niya nauyunan ang ginpakita ni Escudero.
Matandaan nga sa hearing kahapon nga ginpangunahan sang Committee on Energy nga ginapamunuan ni Sec. Raffy Tulfo, ginpahayag sang alkalde nga kinahanglan nga pasabton ang sin- o man nga responsable sa lapnagon nga brown-out kag pabaydon sa ila gintuga nga halit ilabi na nga nagsuprir ang syudad sang malapit PHP2 billion nga kapierdehan bangud sa apat ka adlaw nga blackout.
Sa bahin naman ni Escudero, sa isyu sang pagbawi sa franchise sang National Grid Corporation of the Philippines, ginpahayag sang senador nga mas pakamaayuhon niya ang mas matawhay nga pamaagi agud mapasabat ang korporasyon natuhoy sa power outage.
Samtang, gin-ako man ni Treñas nga ginakwestyon niya si Rep. Lord Allan Velasco nga amo ang chairman sang Committee on Energy sa kamara kun ngaa wala nalakip ang alkalde sa mga resource persons sa hearing subong nga adlaw.
Nahibaluan nga napadal-an ang alkalde sang notice sang hearing apang ang mga gobernador lamang sa rehiyon 6 ang ginpahambal sa hearing.
