ILOILO CITY- Nagapati si Iloilo City Mayor Jerry Treñas nga nagakadapat may limitasyon ang kantidad nga ginapautang sang Iloilo City Government Employees Multi- Purpose Cooperative.
Sa interview sang Bomb Suno kay Mayor Treñas, iya ginpahayag nga dapat ibase sa articles kag pagsulundan sang isa ka kooperatiba kun pila lang ang maximum nga limit nga pwede ipahulam sa opisyal man ukon sa miyembro.
Suno kay Treñas, tuman man ini nga nadismaya sa nagakatabo nga problema sa kooperatiba.
Paathag sang alkalde, magaserbe kuntani nga dalangpan sang mga empleyado ang kooperatiba kun may problema kag kinahangalanon.
Ginkwestyon man niya ang monthly payment nga ginabayad sang mga may dalagko nga utang sa kooperatiba apang tuman ka gamay ang ila ginabayaran sa kada bulan.
Ginalantaw nga naglabot sa 23.7 million pesos ang kabilugan nga loan amount sang mga high-ranking officials sang kooperatiba.
Sapulon naman ni Mayor Treñas subong nga hapon ang mga opisyales sang Iloilo City Government Employees Multi Purpose Cooperative, City Legal Office kag Cooperative Development Authority agud istoryahan ang mga problema.
