ILOILO CITY- Ginkumpirma sang presidente sang Association of Barangay Captains- Jaro District nga mas diutay lang ang mga aktibidad sa kapiestahan ni Nuestra Señora dela Candelaria subong nga tuig kun ipaanggid sang 2023.
Sa interview sang Bombo Radyo kay Ungka Punong Barangay Rodel Mamon, iya ginpahayag nga nalakip sa mga aktibidad subong nga tuig amo ang Garden Show sa Luna Street nga magalawig nag-umpisa sang Enero 29 kag magalawig tubtob sa Pebrero 15; Food and Souvenir Bazaar sa Jaro gymnasium nga nagsugod sang Enero 29 kag magalawig tubtob sa Pebrero 11; Legendary Queens 2024 nga ginpatigayon sang Enero 30; Candle lighting sa Pebrero 1 kag Acrobats show subong nga Pebrero 1.
Suno kay Mamon, wala sang Jaro Fiesta Queen subong nga tuig bangud nga iga-demolish na ang gymnasium gani wala sang venue para sa koronasyon,sa baylo, magaupod lang sa parada ang Jaro Fiesta Queen 2023.
Ginpahayag ni Mamon nga kulang sila sa tiempo bangud nangin masako sila sa pila ka mga aktibidad kaangay nalang sang eleksyon sang Oktubre.
