ILOILO CITY- Na-intercept sang otoridad sa border control checkpoint sa Oton, Iloilo ang isa ka angkar- angkar nga may dala nga anom ka buhi nga baboy.
Ini may kaangtanan sa hugot nga pagbantay agud indi makapagwa sang baboy halin sa Oton kasunod sang narecord nga kaso sang African Swine Fever nga nagresulta sa pagpaidalom sa banwa sa state of calamity.
Sa interview sang Bombo Radyo kay PMajor Fernand Limbungan, hepe sang Oton Municipal Police Station, iya ginpahayag nga natabo ang pagka-intercept sa checkpoint sa border sang Alegre,Oton kag Sta. Cruz, Arevalo.
Gin-turn over sa natungdan nga ahensya sang gobyerno ang nasambit nga mga baboy agud ipaidalom sa test.
Samtang, ginabantayan man subong sang Oton Municipal Police Station sa bulig sang Municipal Bantay Dagat ang baybayon sang Oton matapos naggwa ang report nga may nakit-an sa Poblacion East, Oton nga nagapalusot sang baboy nga ginapasakay sa baroto pakadto sa Iloilo City.
