ILOILO – Ginkakibot sang Barangay Council sang Quintin Salas, Jaro, Iloilo City matapos madala sa listahan sang mga barangay nga wala nakapasar sa una nga hugnat sang validation sang Oplan Hawan.
Sa interview sang Bombo Radyo kay Punong Barangay Riza Delmo sang nasambit nga lugar, iya ginpahayag nga base sa ginhatag sa ila nga grado sang Department of Interior ang Local Government sa validation maathag nga nakapasar sila bangud 94 ang grado nga ila nakuha.
Suno kay Delmo, ginkakibot nalang nila sang gina anunsyar nga nalakip sila sa listahan sang mga barangay nga magapaidalom liwat sa validation.
Dugang sang natungdan, sa pagkamatuod natuman na nila ang tanan nga ginmandu sang Department of Interior and Local Government gani nahatagan sila sang mataas nga grado.
Sa subong, ginpahayag sang punong barangay nga mas pasangkaron nalang nila ang pagpatuman sang pagpanghawan sa ila nga barangay agud madula na ang tanan nga sablag sa mga dalan.
Nanawagan naman ang natungdan sa tanan nga pumuluyo sa iya barangay nga mag kooperar sa ila bangud para ini sa kaayuhan sang ila nga lugar.
