ILOILO CITY – Wala sang may naglapas nga mga bars kag resto bars sa mando ni Iloilo City Mayor Jerry Treñas nga tubtob lang ‘las 12:00 sa tungang gab-i ang pagbaligya sang makahulubog nga ilimnon.
Sa interview sang Bombo Radyo kay Mr. Nestor Canong, pinuno sang Task Force on Morals and Values Formation, iya ginpahayag nga 100% sa mga baligyaan nga ginlibot nila ang nagsunod sa Executive Order 2023-092 nga ginpagwa ni Mayor Treñas.
Suno kay Mr. Canong, nagpasa sila sang progress report kay Mayor Treñas ‘las 3:00 sang aga bangud nga naga-monitor man ang alkalde sa implementasyon sang pagsulundan.
Ginkumpirma man niya nga may yara sang pila ka mga bars ang ginpili nalang nga temporaryo magpanirado kag mag-untat sang operasyon.
Ini ang ila nga paagi agud nga makay-o ang ila polisa kag pagsulundan.
Pahayag niya dugang, naistorya niya ang pila sa mga customer sa una nga gab-i sang pagpatuman sang executive order kag nagagwa nga positibo ang panan-awan sang publiko sa ginapatuman bangud sa nabaton nga mga pagdayaw sa patakaran.
Nagpasalig man ang bahin sang Iloilo City Police Office sa pagpamuno si Police Colonel Joeresty Coronica nga pangunahan nila ang pagpatuman sang pagsulundan.
Dugang pa sang natungdan, masapol subong nga adlaw ang tag-iya sang mga bars kag resto bars agud nga magplastar ang ila recommitment nga ipresentar sa masunod nga semana kay Mayor Treñas.
