Huyhuy ang abaga sang mga electricians nga nagatrabaho sa ginatukod nga condominium unit sa Megaworld, Mandurriao, Iloilo City matapos nga wala nagpakita ang tiglawas sang ila nga kontraktor nga 13th CBC ukon Connectivity Builders Corporation sa ila una nga meeting sa Department of Labor and Employment (DOLE).
Ang amo nga meeting ang nagatuyo kuntani nga solbaron na ang problema sang masobra 15 ka mga electricians nga wala gihapon maswelduhan sang halos duha ka bulan apisar nga paspas man ang ila pangabudlay.
Sa interview sang Bombo Radyo kay Jordan Arandia, isa sa mga electrician, iya ginpahayag nga lunsay pasalig lang ang mahimo sang 13th CBC kag wala man sang mahimo ang mga trabahador kundi nga maghulat na lang.
Nahibaluan nga gindangop sa Bombo Radyo ini nga problema sang mga electricians bangud ginpahayag nga manug-siyam na ka semana nga wala mahatag ang ila sweldo rason nga nagakagutman na sila kag ginapalayas na sa ila nga boardinghouse.
Sandig sa inisyal nga impormasyon nga ginpalab-ot sa ila, gin-hold sang Megaworld main office ang billing kag wala mahatag sa kontraktor.
Indi man subong makita ang ila project engineer nga si Engr. Gelo Quilantang.
