ILOILO CITY – Wala nagapati ang mga empleyado sang Department of Agrarian Reform (DAR) nga ‘work-related’ ang ang pagluthang-patay sa Engineering Aide/Driver sang nasambit nga ahensya sa Brgy. Tagbak, Jaro, Iloilo City.
Sa interview sang Bombo Radyo kay Provincial Agrarian Reform Officer II Lucresia Taberna, iya ginpahayag nga masobra na sa 20 anyos nga nagatrabaho sa DAR ang biktima nga si Alan Salario nga tumandok sang Brgy. Calmay, Janiuay, Iloilo.
Ginpahayag ni Taberna nga bisan sila ang nakibot man sang nahibalu-an sa natabo sa biktima nga isa ka mabuot kag mapisan nga tawo.
Ginpahayag ni Taberna nga wala man nakamuno sa ila si Salario kun bala may yara siya sang naka-away ukon may nabaton nga pamahog sa kabuhi.
Ginpahayag naman ni Flora Gumban, pakaisa ni Alan Salario, nga ilo na sa ginikanan kag wala man sang kaugalingon nga pamilya ang biktima.
Ini ang rason suno kay Gumban kun nga-a syudad sang Iloilo na nagatinir ang iya pakaisa.
Bisan nga malaka lang sila nagakit-anay, ginpahayag ni Gumban nga isa ka mabuot nga tawo si Salario.
Sa subong, ginatugyan na lang nila sa otoridad ang imbestigasyon sa krimen.
Samtang, wala naman naglaum ang abyan ni Salario nga si Alyas Bem-Bem nga ginluthang-patay ang biktima.
Ginpahayag ni Bem-Bem nga naglango-lango pa sanga nakaligad nga semana si Salario nga ihatag na lang sa iya mga abyan ang payag kag ang salakyan sa tion nga mapatay na siya.
Ginpahayag ni Bem-Bem nga wala man niya ginhatagan sang igtalupangod ang lahog ni Salario kag ginkakibot na lang sang mabati-an ang lupok kag nakita nga may yara na sang igo sang bala ang biktima.
