Masobra 1,000 ka mga pampubliko nga eskwelahan sa probinsya sang Iloilo ang gamiton nga polling centers para sa national kag local elections.
Sa inisyal data sang Department of Education (DepEd)- Schools Division of Iloilo, yara na sa 1,128 ka mga eskwelahan ang kumpirmado nga gamiton, apang ginalauman nga madugangan pa ini buwas kun magsulod ang dugang nga reports halin sa mga local government units (LGUs).
Ang 1,128 ang nagikan sa 42 ka mga banwa kag 57 ka districts kag clusters.
Sa interview sang Bombo Radyo kay Mr. Leonil Salvilla, spokesperson sang DEPED-Schools Divison of Iloilo, iya ginpahayag nga may yara naman sang 12,436 ka mga manunudlo nga amo ang maga-assist sa eleksyon.
Ini nga mga teachers amo ang maga-serbe bilang board of election inspectors (BEI).
Ini man nga mga manunudlo ang makabaton sang honoraria, travel allowances, communication allowances, anti-COVID-19 allowances kag service credits bangud sa ila mangin serbisyo.
Ang mga eskwelahan nga gamiton ang may yara sang disinfection areas kag help desk agud nga ma-assist ang mga botante.
Umpisa sa Mayo 2 tubtub sa Mayo 13, suspendido man ang tanan nga klase sa public schools bangud sa “national election-related activities.”
Apisar long-break ini para sa mga estudyante, ang mga manunudlo ang ginalauman gihapon nga mag-report sa eskwelahan sa mga adlaw nga wala sang election-related duties ukon activities. ##
