ILOILO CITY-Wala sang piyansa ang mga kaso nga ipasaka sang Presidential Anti-Organized Crime Commission (PAOCC) batok kay Bamban, Tarlac Mayor Alice Guo sa Department of Justice sa masunod nga mga inadlaw may kaangtanan sa kahilabtanan sini sa Philippine Offshore Gaming Operators (POGOs).
Suno kay Presidential Anti-Organized Crime Commission (PAOCC) spokesperson Winston John Casio, maga-convene ang inter-agency body kun sa diin desisyunan kag tapuson ang mga kaso nga ipasaka batok kay Guo nga kalabanan diri ang non-bailable cases.
Nahibaluan nga tubtob subong, kuwestiyonable sa gihapon ang pagkatawo kag citizenship ni Guo.
Suno kay Casio, nakakuha sila sang madamo nga dokumento nga may pangalan kag pirma ni Guo sa isa ka POGO hub sa compound nga ginpanag-iyahan sini sadto.
Una na nga gindagdagan sang anom ka bulan nga suspensiyon sang Office of the Ombudsman sanday Edwin Ocampo, business permit and licensing officer kag municipal legal officer Adenn Sigua.
Ini kasunod sang administrative complaints sang Department of the Interior and Local Government sa kaso nga grave misconduct, serious dishonesty, gross neglect of duty kag conduct prejudicial to the best interest of the service.
Ginpahayag naman ni Casio nga wala nila ginakonsiderar nga person of interest si anay Palace spokesperson Harry Roque sa imbestigasyon sang POGO operations sa Lucky South 99 sa Porac.
Matandaan nga may mga letter head kag sulat nga nakit-an sa raid kun sa diin pirmado ini ni Roque.
