ILOILO CITY-Nagpaandam ang Iloilo Provincial Agriculture Office sa mga mangunguma nga ipaiway ang pagtanom sang humay kun wala man lang sang kuhaan sang tubig ilabi na nga nag-umpisa na ang El Niño Phenomenon.
Sang damlag lang, gin-upgrade sang state weather bureau ang warning status humalin sa El Niño Alert nga nangin El Niño Advisory kun sa diin gin-issue ini kun nagapadayon na ang weather phenomenon.
Apisar nga mahina pa lang ang El Niño, lauman nga sa palaabuton nga bulan, magapakita ini sang senyales sang pagkabaskog ilabi na sa mangin epekto sini sa water resources, agrikultura, enerhiya, health kag public safety.
Sa interview sang Bombo Radyo kay Dr. Ildefonso Toledo, Provincial Agriculturist, iya ginpahayag nga kun indi man lang sigurado kun may kuhaan sang tubig ukon layo sa irigasyon, mas maayo nga indi na lang magtanom sang humay bangud nga dako lang ang mapyerde sang mga mangunguma.
Suno kay Toledo, may mga pananom nga indi kinahanglan ang tuman ka damo nga tubig kag pwede gid anay nila ini himuon nga alternatibo sa humay.
Apang sa mga mangunguma nga nakaumpisa na tanom sang humay, pahayag niya, mas maayo nga ihanda na lang ang pump irrigation.
Ginaabisohan sang natungdan ang mga mangunguma nga magtanum sang utan ukon high-value crops subong nga tag-ilinit.
Sa pagkamatuod pahayag niya, may yara sang climate resilience program ang Provincial Agriculture Office sa diin naga-eksister ang small scale-irrigation project kag water system projects sa barangay level.
Magluwas sini, may programa man nga ginapatuman ang provincial government kaangay sang small water impounding kag small farm reservoir sa idalom sang small-scale irrigation project.
Nahibaluan nga sang tuig 2019, ginpaidalom sa state of calamity ang probinsya bangud tanan nga 42 ka mga banwa kag isa ka component city ang naapektuhan sang El Niño sa diin naglab-ot sa masobra P1.2 billion ang rice crop losses.
