ILOILO CITY- Nagakahangawa subong ang mga Filipino nga manugpangisda sa Pangasinan para sa ila palangabuhian kag seguridad bangud sa ginaalegar presensya sang Chinese vessels nga nasiplatan sa kalayuon nga 20 nautical miles halin sa baybayon sang banwa sang Infanta.
Kapin sa 2,000 ka mga manugpangisda sa Infanta ang nagapadayon sa ila pagpangisda apang yara lamang sa kalayuon nga 100 nautical miles halin sa coastline sang banwa.
Ginpahayag man nga sang Disyembre pa ang ulihi nila nga pagpangisda sa Scarborough Shoal ukon Bajo de Masinloc bangud nga ginabalabagan sila sang China.
Nagapakig-angot na subong ang grupo sang manugpangisda sa mga otoridad agud makumpirma kun ang nakit-an nga mga vessels ang ginapanag-iyahan sang China.
Ang ginaalegar nga presensiya sang Chinese vessels ang kasunod sang pagpatuman sang Beijing sang no trespassing policy kun sa diin i-detain sang China Coast Guard sang tubtob 60 ka adlaw nga wala sang trial ang sin-o man nga magsulod sa ila territorial claims.
