ILOILO CITY – Nagapanawagan si Iloilo City Mayor Jerry Treñas sa mga opisyal sa Brgy. Sto. Niño Sur, Arevalo, Iloilo City nga buligan ang pagpanagtag sang food assistance sa tanan nga mga pumuluyo.
Ini matapos ang madamo nga reklamo sang mga tawo nga wala sang may nakalab-ot nga food packs apisar katapusan na nga adlaw sang pagpatuman sang extreme enhanced community quarantine.
Sa interview sang Bombo Radyo kay Treñas, iya ginpahayag nga nahangpan niya nga nagahalong man ang mga opisyal bangud bug-os nga lugar ang ginpaidalom sa nasambit nga quarantine, apang kun tani, magpangita man sila sang paagi nga mabuligan ang distribution sang food packs.
Nahibaluan nga una na nga ginpahayag ni Treñas nga si Executive Assistant Mark Ryan ‘Goygoy’ Acap na ang in-charge sa pagdul-ong sang food packs sa mga pumuluyo.
Ini ang ginalakipan sang isa ka kilo nga karne sang manok kag baboy, bugas, utan, tubig kag hygiene kits.
Pahayag sang alkalde, nakapadala na siya sang Personal Protective Equipment (PPEs) nga mahimo magamit sang mga barangay frontliners.
Nagpasalig ang natungdan nga magapadayon ang distribution sang pagkaon subong nga adlaw kag magluwas diri, nagapangita man siya sang suplay sang Vitamin C nga mahimo mapanagtag sa mga tawo.
Nahibaluan nga ginpatuman ang extreme enhanced community quarantine sa lugar matapos ang anum ka kaso sang Coronavirus Disease 2019 (COVID-19) kag kumpirmado nga local transmission.
