Mahilig ka bala magpulaw? Pamatyag mo angkon mo ang bilog nga kalibutan humalin las 10:00 sang gab-i tubtob kaagahon sa diin mas productive ka kag creative?
Nahibaluan nga ang pag-angkon sang kompleto nga tulog ang tuman ka importante para sa ikaayong lawas sang isa ka indibidwal.
Apang suno sa health expert, wala man sang problema ang baliskad nga sleeping pattern kag kun mas pabor sa isa ka indibidwal ang pagtrabaho kun gab-i sa baylo nga sa aga.
Suno kay Dr. Sharad Paul, skin cancer specialist sa New Zealand, mas nagagana ang adenosine activity sa utok sang mga tawo nga nagabugtaw tubtob magkaagahon.
Pahayag sang doktor, madamo sang nagahambal nga nabudlayan ang mga nagapulaw kun gab-i sa pag-angkon sang focus apang kun ginabalanse lamang kag ginabawi ang tulog, makabig nga mas mentally alert ang mga nagabugtaw kun gab-i bangud sa nagadugang nga adenosine activity sa utok.
Dugang pa sang doktor, natukiban man nga ang mga tawo nga makabig nga ‘night owls’ ang may yara sang mataas nga inductive reasoning sa diin mas malawig ang enerhiya kag endurance sang mga ini.
