Gin-athag sang Department of Social Welfare and Development (DSWD) Region VI nga wala sang programa ang ahensya nga nagasugo sa pila ka indibidwal nga magpangbalay-balay kag magpanglista sang pangalan sang mga pigado nga pamilya kabaylo sang ibayad nga kuwarta.
Kasunod ini sang report nga nabaton sang Bombo Radyo nga sa Barangay Calumpang, Molo, Iloilo City, may mga indibidwal nga nagalibot kag nagapahayag nga nagalista sila sang “poorest of the poor” sa barangay agud nga mangin benepisaryo sang programa sang DSWD. Nagapangayo ang certain individuals sang P150 bilang bayad.
Sa interview sang Bombo Radyo kay Mae Castillo, spokesperson sang DSWD Region VI, iya ginpahayag nga indi ini lehitimo.
Tanan nga listahanay sang DSWD program beneficiaries ang nagaagi sa database suno kay Castillo kag wala sang sukot nga kuwarta.
Una diri, sang Pebrero 1, may ginpa-guwa man nga advisory ang ahensya nga nagapahayag nga indi man lehitimo ang text messages nga nagapangsugid-sugid sa mga tawo nga may implementation sang Social Amelioration Program (SAP) para sa mga senior citizens.
Ginapahayag sang sender nga benepisyaryo sang SAP ang receiver sang text message kag gina-require man ang receiver nga mag-send sang email ad para sa briefing.
Tanan ini ang indi nagikan sa DSWD Field Office VI, sandig sa Facebook post sang ahensya. Naghingyo si Castillo sa publiko nga i-report sa otoridad kun may ma-encounter nga kaangay sini nga mga indibidwal ukon messages. ##
