ILOILO – Magapatigayon sang isa ka adlaw nga untat-byahe ang pila ka mga drayber sang pampubliko nga jeep sa syudad kag probinsya sang Iloilo.
Sa interview sang Bombo Radyo kay Edgar Salarda, presidente sang Pinagkaisang Samahan ng mga Tsuper at Operator Nationwide-Panay, iya ginpahayag nga ang katuyuan sang patigayunon nga untat-byahe amo ang hugot nga pagpamatok nila sa pagdula sang mga daan nga unit sang salakyan bilang kabahin sang modernization program.
Suno kay Salarda, indi pa masarangan nga ihatag sang jeepney operators ang ginahingyo sang Department of Transportation kaangay na lang sang pagpailis sang mga makina sang jeep.
Nahibaluan nga ginbawi na ni Department of Transportation Secretary Arthur Tugade ang emergency power agud mas madasig nga mapatuman ang pag phase-out sang mga daan nga salakyan.
Sa pihak sini, nagakabalaka ang mga transport group bangud sa tion nga mapatuman ang modernization program, madamu ang madulaan sang palangabuhi-an.
Ang nasambit nga untat-byahe sa Setyembre 30 ang pagabuylugan sang tanan nga mga transport group sa bilog nga pungsod.
