ILOILO – Nagpabutyag sang pagkadismaya ang pila ka mga tricycle driver sa probinsya sang Guimaras matapos nga ginapapanaog ang Memorandum Number 2020-004 sang Department of the Interior and Local Government (DILG) ukon ang mandu nga naga dumili sa mga tricyle, pedicabs kag motorized pedicabs nga magbyahe sa mga national highways.
Sa interview sang Bombo Radyo kay Alyas Joebert, isa ka tricycle driver iya ginpahayag nga tuman ka budlay ang ila sitwasyon subong bangud ang ila nga kita nagikan sa pagbyahe sang tricycle ang ginasaligan nila.
Suno kay Joebert, mas dako ang ila nga kita kun nagabyahe sila tubtob sa national highways apang wala sila sang mahimo kun na implementa na ini.
Dugang sang natungdan, nagalaom sila nga maintindahan man sang local government ang ila nga sitwasyon bangud indi lang sila ang mabudalayan lakip man ang mga pasahero bangud mangin mabudlaya na sa ila nga magpangita sang salakyan ilabi na kun gab-i.
