ILOILO CITY- Nagaantos ang mga vendors sa tuman ka gamay nga benta sa ila ginabaligya bangud sa pagbaha sa ila nga mga temporary stalls sa Iloilo Terminal Market.
Sa interview sang Bombo Radyo kay Gloria Callado, vendor nga nakapwesto sa stall sa Corner De Leon-Fuentes Streets, iya ginpahayaga nga humalin pa sang nagligad nga Hunyo nga ginaeksperyensiya nila ang maitom kag mabaho nga tubig baha kun mag-ulan.
Suno kay Callado, ini ang rason kun ngaa malaka na lang ang mga customer nga nagabakal sa ila.
Suno naman kay Eduardo Rico,manugbaligya sang prutas, dali na lang sila magkalamatay sa gutom bangud halos wala na gid sang may nagakadto sa ila pwesto agud magbakal.
Suno sa iya, luyag man kuntani nila magsaylo apang wala man sila sang sayluhan.
Wala naman ini nagpanawagan sa Iloilo City Government bangud napat-ud niya nga indi man ini masolusyunan.
