Patay ang pinuno sang militar sang Kenya amo man ang siyam ka iban pa nga mga senior military officers bangud sa pagtibusok sang ila ginasakyan nga helicopter.
Suno kay Kenyan President William Ruto, natabo ang insidente minutos lang gid ang nakaligad halin sang nag-take off ang helicopter sa Cheptulel Boys Secondary School sa West Pokot County.
Ginpahayag nga nagbisita ang biktima nga si General Francis Ogolla kag ang iya kaupdanan sa ila tropa nga naka-deploy sa northwest Kenya agud tapnaon ang kinawatay sang baka.
Duha naman ka soldado ang nakaluwas sa amo nga hitabo kag subong ginabulong sa ospital.
Si Ogolla amo anay ang head sang Kenyan air force antes ini nagpungko bilang deputy military chief kag gin-promote ni Ruto sang nagligad nga tuig nga magpamuno sa bilog nga militar sang pungsod.
Sa masunod nga semana, nakatalana kuntani ini nga mag-40 na ka tuig sa serbisyo sa militar.
Bangud sa makahalunusbo nga hitabo, may tatlo ka adlaw nga period of mourning sa Kenya nga magasugod subong nga Abril 19 kun sa diin iga-half mast lamang ang hayahay sang Republic of Kenya sa pungsod kag sa Kenyan missions sa iban nga mga nasyon.#
