ILOILO – Wala sang pisikal ukon face-to-face nga misa nga patigayunon sa probinsya sang Iloilo samtang napaidalom sa Enhanced Community Quarantine (ECQ).
Sandig sa Executive Order 258 ni Iloilo Governor Arthur Defensor, Jr., via online lang ang pagtambong sa mga misa.
Sa syudad sang Iloilo, apisar ECQ man ang classification, ginapahanugutan ang face-to-face nga misa apang tubtub lamang sa 10 percent sang venue capacity.
Sa interview sang Bombo Radyo kay Father Angelo Colada, director sang Commission on Social Communications sang Archdiocese of Jaro, iya ginpahayag nga sundon sang archdiocese ang executive orders sang duha ka local chief executives depende kun sa diin nahamtang ang parokya.
Sa syudad sang Iloilo, ginaabisuhan ang mga tumuluo nga makig-angot sa ila tagsa ka parokya bangud may yara nga magasunod sang ila nga regular Sunday schedule.
May yara man parokya nga may face-to-face mass bangud may mga church-goers sa gihapon apisar limitado na ang hulag sang tawo sa bug-os nga syudad.
