ILOILO CITY- Nabuhinan na ang kahangawa kag pangabudlay sang mga residente sa Dingle, Iloilo bangud nga mahimo na nga malabayan sang mga single nga motorsiklo kag tricycle ang hanging bridge sa Barangay Moroboro sa nasambit nga banwa.
Ginpainan ini sang P5 million nga pondo halin sa Provincial Government para ma- rehabilitate ang hanging bridge.
Sa interview sang Bombo Radyo kay Dingle Vice Mayor Quindialem Villanueva, iya ginpahayag nga ang ginadumilian lang nga makalabay sa hanging bridge amo ang 4-wheeled vehicle.
Samtang nagpasalig naman si Iloilo Governor Arthur Defensor Jr. nga ipa-inspect anay niya sa Department of Public Works and Highways ang nasambit nga taytay agud nga makalabay man ang mga salakyan samtang wala pa matapos ang Monfort bridge.
Bangud natapos na kaayo ang hanging bridge, mangin mas madasig na kag mahapos para sa mga barangay sa lugar nga magpadulong sa banwa, sa national highway kag iban pa nga barangay sang Dingle.
