Ginbuyagyag ni Justice Secretary Boying Remulla nga indi brand-new ang MT Princes Empress nga naglugdang nga amo ang rason sang oil spill sa Oriental Mindoro kag sa kaiping nga mga probinsya lakip na sa Antique.
Suno sa tiglikom, naghalin na sa rebuilt scrap ship ang amo nga vessel kag duha ka beses na nga gin-kay-o agud mahimo lamang nga tanker.
Sa una nga tion nga gin-rebuild ini suno kay Remulla, gin-modify ini agud mahimo nga liquefied petroleum gas carrier. Sa ikaduha nga bes, ginhimo na ini nga tanker.
Ginauyatan na subong sang Department of Justice (DOJ) ang affidavit sang tawo nga naghatag sang tuman ka importante nga mga detalye sa amo nga barko.
Isa ang DOJ sa mga ahensya nga ginhingyuan sang bulig kasunod sang oil spill incident nga natabo kasunod sang paglugdang sang amo nga motor tanker sang Pebrero 28 sa Naujan, Oriental Mindoro karga ang 800,000 ka litro sang industrial fuel.
Ginkumpirma man ni Remulla nga may mga insidente na sang nagligad kun sa diin diutayan lang maglugdang amo man nga vessel.
Napahibalo na suno sa iya sa operators nga gale warnings sang Pebrero 27 antes naglayag sa dagat, apang nagdayon gid ang MT Princess Empress sa byahe.
Ginalantaw na subong sang gobyerno ang pagpasaka sang criminal kag civil cases kasunod sang epekto nga natuga sang pagtagas sang langis. ##
