ILOILO CITY – Nagakinahanglan nga pamatud-an ni anay Provincial Administrator/ Blocktimer Manuel ‘Boy’ Mejorada nga may yara sang ginlapas ang arresting authorities sa pagserbe sang warrant of arrest.
Ini ang may kaangtanan sa akusayson ni Mejorada batok kay Police Major Jonathan Pinuela sang Provincial Special Operations Group.
Sa interview sang Bombo Radyo kay Atty. Joseph Celis, Regional Director sang National Police Comission (NAPOLCOM) 6, iya ginpahayag nga sa pagserbe sang warrant of arrest, kinahanglan nga sundon sang arresting officer ang nagakaigo nga proseso agud nga indi mabalikan sang kaso.
Ginpahayag ni Celis nga mahimo nga makaserbe sang warrant of arrest ang arresting officer nga nakasuksuk sang uniform ukon civilian clothes.
Agud nga malikawan ang pagduda, ang arresting officer ang dapat nga magpakilala sa akusado paagi sa pagpakita sang identification card ukon tsapa.
Bag-o dakpon ang akusado, kinahanglan anay nga basahon sang arresting officer ang miranda rights.
Mahimo naman nga kasuhan ang arresting officer nga wala nagsunod sa pagbasa sang miranda rights sang isa ka akusado.
Sa bahin naman sa ginareklamo ni Mejorada nga trespassing, ginpahayag ni Celis nga tubtub nga wala sang kinagamo nga matabo, may yara sang kinamatarong ang arresting officers nga magsulod sa balay agud nga iserbe ang warrant of arrest.
Ang warrant of arrest suno sa NAPOLCOM Regional Director ang mahimo nga iserbe sa anoman nga oras kag adlaw.
