Gindula sang Commission on Elections (Comelec) ang kahangawa sang mga botante nga posible maghurma ukon magbakat ang markers nga ila gamiton sa pag-shade sang ovals sa balota kag makaapekto sa boto nga iban nga kandidato sa back page ukon sa front page.
Duha ka pahina nga balota ang gamiton sa eleksyon: sa front page nakabutang ang lista sang mga national and local leaders nga pilian, samtang sa likod naman ang full page sang party-list candidates kun sa diin isa ang pilion sang mga botante.
May mga nagalalapta subong nga screenshots sang text messages nga nagpahayag nga nagalusot ang marker sa Page 1 ukon Page 2 sang balota, kag posible tunaan ini nga ma-invalidate ang boto sa likod ukon sa atubang sang balota bangud posible basahon sang machine ang naglusot nga marker.
Sa interview sang Bombo Radyo kay Atty. Wil Arceño, Antique provincial elections supervisor, iya ginpahayag nga indi ini matuod.
Paathag ni Arceño, madamol ang i-provide nga balota.
Ginpasigurado man sini nga indi magdulot sa likod (or vice versa) ang mark nga ibutang sang botante.
Sa ballot face templates nga ginpakita sa website sang Comelec, makit-an man ang desinyo sang balota.
Gin-design ang balota nga indi magtupong ang ovals sa likod kag sa atubang agud nga kun maglusot, indi ma-igu ang ovals sa likod (ukon sa atubang).
Kun magboto naman, panugyan sang Comelec:
- Gamiton ang official pen nga iga-provide sa sulod sang presinto
- Magdala na nga daan sang kodigo agud nga indi na magtinir sa sulod sang presinto
- Maghalong sa oval nga i-shade bangud indi na pwede nga maggamit sang white out kun hinali sala ang ginmarkahan.
