ILOILO– Nagpapanaog sang memorandum ang National Food Authority nga nagamando nga pasakaon ang presyo sang humay.
Nahibaluan nga gikan sa orihinal nga presyo nga P17 kada kilo, paagi sa ginpapanaog nga memorandum, mangin P19 na ang kada kilo sang humay.
Ini may kaangtanan sa gihapon sa nagapadayon nga epekto sang pagnubo sang presyo sang humay kun sa diin apektado ang mga mangunguma.
Sa interview sang Bombo Radyo kay Jose Mario Pacificador, Provincial Manager sang National Food Authority 6, iya ginpahayag nga nakig-angot na ang ila talatapan sa mga Local Government Unit sa probinsya sang Iloilo kag kay San Enrique Mayor Trixie Fernandez, Presidente sang League of Municipalities of the Philippines- Iloilo Chapter sa pagpahamtang sang mga mobile buying station sa kada banwa.
Suno kay Pacificador, nagapadayon na ang pagpamakal sang National Food Authority sang humay sa mga mangunguma sa pila ka mga banwa sa probinsya paagi sa mobile buying stations.
Sa subong may yara na sang 102,000 ka mga sako sang humay nga nabakal ang ahensya.
Ginpasiguro ni Pacificador nga baklon sang National Food Authority ang tanan nga humay sang mangunguma apang kinahanglan sa gihapon nga magpadala ang Local Government Unit sang letter of request.
