Ginkumpirma sang Department of the Interior and Local Government (DILG) nga indi armado ang driver sang National Bureau of Investigation (NBI) nga gindakop kadungan sang gunfire incident sa Senado sang Myerkules sang gab-i, Mayo 13.
Suno kay DILG Secretary Jonvic Remulla, nasuguan lamang ang driver nga magkuha sang tactical bag nga nabilin sang NBI agent nga amo ang gin-assign nga magbantay sa pwertahan sa Senate premises.
Suno kay Remulla, wala pa sang kasiguruhan sang amo nga tion gani nga gindakop ang driver samtang nga nagapatigayon ang mga pulis sang clearing operations.
Magluwas diri suno sa tiglikom, nagdugang man ang ila nga pagpangduha-duha bangud sa presensya sang tactical bag nga sang ulihi nadiskubrehan nga iya gali sang NBI agent nga nagabantay didto.
Pahayag pa sini, may identification ang driver kag wala sang armas nga dala.
Ini nga pagpaathag ang kasunod sang pag-link sang kadam-an sa 44-anyos NBI driver sa shooting kag bangud sa ginaalegar nga gunpowder residue findings sa paraffin tests.
Antes pa man sini, nagdepensa na ang driver nga ginkilala sa reports bilang si Mel Oragon nga wala siya nagpalupok sang armas. Gina-insister man sini nga wala siya nakauyat sang pusil kadungan sang komosyon kag nagapanindugan man nga ginsugo lamang nga kuhaon ang sling bag nga nabilin sa GSIS compound.
Suno naman kay NBI Director Melvin Matibag, ang dala lamang sang driver sang amo nga tion amo ang vest kag radyo.
Pahayag ni Matibag, nagbalik ang driver agud kuhaon ang isa ka bag nga nabilin sang iya upod apang ginlagas siya samtang yara sa GSIS canteen, gin-aresto, kag gindala sa sulod sang Senado.
Gin-alegar sang hepe sang NBI nga ginpahapa ang driver sa lugar kun sa diin nagpalupok ang mga personnel halin sa Office of the Sergeant-at-Arms (OSAA), kag posible suno sa director nga amo ini ang rason kun ngaa may nakita nga gunpowder residue sa driver sang ginpaidalom siya sa test.
Una naman nga ginplastar sang DILG kag PNP sa press conference kahapon nga wala sang pagpang-atake nga natabo sa Senado. Ginsapubliko nila ang natipon nga CCTV footages bilang suporta sa amo nga claim.#
