Nagpangabay si National Irrigation Administration (NIA) Administrator Eduardo Guillen sa publiko nga untatan ang pag-usik sa bugas sa tunga sang posible kakulangan sa mangin suplay sini bangud sa epekto sang El Niño phenomenon sa produksyon sang humay.
Suno kay Guillen, kun indi maubos ang isa ka cup sang kan-on, mas maayo nga half lang anay ang i-order agud nga wala sang mahaboy pananglitan indi maubos.
Suno pa kay Guillen, dapat magpatigayon ang local government units (LGUs) sang nagakaigu nga preparasyon agud mahagan-hagan ang epekto sang El Niño sa ila tagsa ka hurisdiksyon.
“We are appealing for unity. We call this ‘bayanihan.’ The LGUs can help more as they are the missing link. As a former mayor (of Piddig, Ilocos Norte), I know that LGUs can help as they have their own funds,” pahayag ni Guillen.
Nagpaandam naman ang presidente sang farmers’ group nga Philippine Chamber of Agriculture and Food Inc. nga si Danilo Fausto nga ang El Niño phenomenon isa ka daku nga pamahog sa food supply sang pungsod sa masunod nga tuig.
Suno kay Fausto, kulang ang Department of Agriculture (DA) sa konkreto nga mga tikang agud nga ma-hagan hagan ang epekto sang El Niño. Maathag ang programa suno sa natungdan apang yara naman sa implementasyon ang problema.
Ginsaad sini nga kinahanglan kaayuhon ang diversion dams kag ang lateral canals halin sa dams.
Pahayag sini, 75% sang palay production sa pungsod ang nagikan sa irrigated areas gani kun palpak ang gobyerno sa pagsuplay sang tubig, apektado sini pati ang ani nga humay.
Ginpahayag man sini nga ini nga mga epekto ang posible mabatyagan sa una nga trimester sa masunod nga tuig lakip na ang pagsaka sang retail prices sang pagkaon pananglitan mangin limitado na gid man ang suplay sini sa pungsod. #
