GUIMARAS – Gin-athag ni Buenavista, Guimaras Mayor Eugene Reyes nga wala sang segregation sang hospital waste ang Buenavista Emergency Hospital rason nga wala nadala sa pagkolekta sang mga basurero.
Sa interview sang Bombo Radyo kay Reyes, iya ginpahayag nga indi niya luyag nga ikompromiso ang ikaayong lawas sang tawo sa lugar bangud sa basura sang hospital.
Suno kay Reyes, sigurado siya nga nakahibalo man si Guimaras Governor Samuel Gumarin sa mga pasulundan kaangay sang “No Segregation, No Collection” bangud siyam ini ka tuig nga nangin alkalde sang nasambit nga banwa.
Ginpahayag ni Reyes nga nagpadala man siya sang sulat kay Gumarin agud athagon kun sin-o ang may awtoridad sa pagdumala sa Buenavista Emergency Hospital.
Nahibaluan nga yara sa idalom sang pagdumala sang Guimaras Provincial Government ang nasambit nga hospital apang suno kay Reyes, ini ang gindonar sang pamilya Salvador sa Buenavista.
